Pinasingkedan ti Malakanyang a dagiti infrastructure projects ti Department of Public Works and Highways (DPWH) nga addaan ti P60 agingga P80B a pondo ti saan nga impa-release ni Presidente Ferdinand Marcos Junior iti sidong ti 2025 national budget.
Kinuna ni Palace Press Officer Undersecretary Claire Castro a dagitoy ket insertions nga infrastructure projects ket inaramid ti Kongreso kas maibasar metten iti report manipud ti Department of Budget and Managements (DBM).
Ti rason ti Presidente nu apay a saan na nga impa-release ti nasao a pondo ket gapo ta saan a maitunos dagitoy iti Philippine Development Plan ti Marcos administration, banag a pinasingkedan met ni Finance Secretary Ralph Recto iti naangay a budget briefing ti Development Budget Coordination Committee (DBCC) idi aldaw ti Lunes.
Maipalagip a sakbay a pinermaan ni PBBM ti 2025 GAA ket nangisayangkat pay nga umuna isuna ti budget review ken idi maikauppat a State of the Nation Address na ket kinunana a nakasagana na nga i-veto ti 2026 national budget nu saan a maitunos daitoy iti 2026 National Expenditure Program.
Iti agdama ket desidido ti Presidente nga ipasardengen dagiti anomalya, nangruna kadagiti flood control projects.
