Impaganetget ni House Appropriations Committee Vice Chair Zia Alonto Adiong nga isaysayangkaten ti Lower House ti Kongreso iti panangisubli ti ₱60 billion a pondo ti Philippine Health Insurance Corporation wenno PhilHealth.
Segun kenni Adiong, daytoy nga addang ket kas dagus a sungbat iti direktiba a nagtaud mismo kenni Presidente Ferdinand R. Marcos Jr.
Naaramid daytoy sakbay nga impaulog ti Korte Suprema iti maysa nga order a mangibilbilin nga isubli iti nasao a pondo babaen ti 2026 national budget.
Daytoy a waragawag ni Adiong ket maysa a direkta a sungbat iti napalabas nga statement ni Cardinal Pablo Virgilio David, a saan nga rumbeng a simple laeng a “backfilling” iti maaramid, ken rumbeng met a makamat ken maimbestigaran dagiti indibidual wenno grupo a maipagarup a nagnumar ken kimmita manipud iti panangiyalis ti pondo.
Manipud iti orihinal a ₱53 billion nga alokasion para ti PhilHealth inton 2026, nanayunan pat daytoy ti ₱60 billion, isu nga iti pakabuklan nga alokasion ket dumanon ti ₱113 bilion babaen ti badyet nga inaprobaran ti Kamara.#
