BR LA UNION – Dinadael ken inuram dagiti otoridad ditoy La Union dagiti nadiskubre ken naparut a puon ti marijuana iti dua a planting sites idiay Brgy. Bayabas, San Gabriel, La Union.
Dagiti nasao nga uprooted marijuana plants ket agbalor ti P700,000.
Naisayangkat ti operasyon idi malem ti Miyerkoles, Enero 15.
Maibasar iti report ti La Union Police Provincial Office, adda pakabuklan a 3,500 a pinuon ti marijuana plants iti pinarut da kabayatan iti operasyon ken inuram ti joint operating units nga indaulwan ti San Gabriel Police Station.
Maibasar iti statement ni PCOL HERYL L BRUNO, director iti La Union Police Provincial Office, maysa a concerned citizen iti nangidanon kadakuada ti impormasyon maipapan iti dua a lokasyon ti nakai-mulaan ti illegal a droga.
Dagus a nagtignay dagiti otoridad babaen iti insayangkat da nga eradication effort iti nasao a lugar.
Iti agdama, nainget ti panangimbestigar dagiti otoridad tapno duktalen iti posible a cultivator wenno agmul-mula kadagiti nasao a marijuana planting sites.
