Nadutokan ni eight-division world champion Manny “Pacman” Pacquiao kas baro a Vice President ti International Boxing Association (IBA).
Daytoy ti kaunaan a boxing federation iti intero a lubong sakbay a timpuar dagiti dadduma pay a grupo.
Naisayangkat ti pormal a panangidutok iti Board of Directors meeting ti IBA a naangay idiay Manila idi Oktubre 27, 2025, kagiddan iti maika-50 anibersaryo ti “Thrilla in Manila.”
Manamnama ni Pacquiao kas Bise Presidente nga idauluan iti panangbukel dagiti athlete-centered programs, panangpalawa ti boxing rehiyon ti Asya, ken itandudo iti karbengan dagiti boksingero iti intero a lubong.
Makatrabaho na ni IBA President Umar Kremlev kadagiti reporma ken inisyatiba nga addaan panggep nga isubli ti panagtalek iti organisasion kalpasan a maikkatan daytoy ti karbengan nga agorganisa ti Olympic boxing events ti International Olympic Committee (IOC) idi 2021 gapo kadagiti isyu ti panangimaton ken transparency.
Ti IBA ket sigud nga am-ammo kas Amateur International Boxing Association, ket naminsanen a nangmanehar ti boxing iti Olympics.
Inton 2028, ti World Boxing iti agorganisar ti Los Angeles Olympics.
Agtaltalinaed met nga aktibo iti IBA kadagiti sangalubongan a programa para kadagiti amateur ken professional boxers.
Manamnama met nga agbalin nga inspirasion ni Pacquiao kadagiti baro nga henerasion ti boksingero.
Ti panagakar na manipud iti ring ken agturong ti boardroom ket simbolo ti agtultuloy a panagserbina iti sports a nangipaay kenkuana ti sangalubongan a panakabigbig.###
