Nangiyebkas ti kinasagana ken tarigagay a tumestigo iti maipagarup a sigud a bagman ni Bise Presidente Sara Duterte a ni Ramil Madriaga para iti impeachment proceedings no daytoy ket ibilin ti Senado ken ti Kamara.
Iti maysa a pannakiuman, kenuna ti legal counsel ni Madriaga a ni Atty. Raymund Palad a nakadependir iti desision no maipaayan ti kliyentena ti subpoena tapno dumar-ay kadagiti panagdingeg iti impeachment.
Malaksid ditoy ket mabalin pay isuna a paayaban ti kongreso ken Ombudsman gapu iti panagsubmitirna ti salaysay.
Nasdaaw met iti kampona iti pannakausar ti affidavit daytoy iti pannakaipila dagiti impeachment complaints kontra kenni VP Sara.
Nakalanad iti nasao nga affidavit dagiti akusasion ni Madriaga kontra iti maikadua a presidente maipapan iti maipagarup a pannakausar ti kuarta manipud ti Philippine Offshore Gaming Operations (POGO) ken kadagiti drug dealers para ti kampaniana iti napalabas a 2022 elections.
Kabayatanna, pinasingkedan ni Palad a kiniddaw ni sigud a Senador Antonio Trillanes a sarungkaranna ni Madriaga tapno pagsaritaan dagiti dadduma pay a linaon ti affidavit, a pinalubosan met ti kampoda.
Nakatuding nga umapela ken agsubmitir iti kampo para ti maysa a Witness Protection Program (WPP) gapu kadagiti maaw-awat na a death threats.###
