Nagpakdaar ti Philippine Atmospheric, Geophysical and Astronomical Services Administration (PAGASA) iti publiko kontra kadagiti indibidwal nga agparparang kas opisyales ti ahensya tapno kumiddaw kadagiti donasyon para ti peke a foundation.
Iti maysa a statement ita nga aldaw ti Dominggo, kinuna ti ahensya a maysa a contractor ti nakaawat ti email manipud ti peke nga opisyal a kumidkiddaw ti kontribusyon.
Nadagsen a pinaglibakan daitoy ti PAGASA ken innayon nga awan ti palpalubosan da nga indibidwal wenno organisasyon nga usaren ti nagan ti PAGASA wenno dagiti empleyado da para ti bukod nga interes.
‘We do not tolerate and detest that misrepresentation,’ kinuna ti ahensya.
Inallukoy met iti PAGASA iti publiko nga i-report ti aniaman a kapada nga insidente iti Public Information Unit iti numero a (02) 8284-0800 local 1100-1101 wenno iti email nga information@pagasa.dost.gov.ph.
Ti DOST-PAGASA ket maysa nga ahensiya a mangipapaay ti weather forecast, tropical cyclone warnings, ken flood advisories para ti kinatalged ti publiko.
