Impasigurado ti Malacañang a maarestaren kadagiti sumaganad nga aldaw dagiti dadakkel a personalidad a karaman iti pananglustay iti pondo ti pagilian para kadagiti flood control projects.
Kasaruno daytoy iti kari ni Presidente Ferdinand Marcos Junior a sakbay nga agpaskua ket mabaluden dagiti personalidad a karaman iti flood control scam, karaman dagiti naawagan a “big fish” iti nalawa a korapsion.
Segun kenni PCO Secretary Dave Gomez, mangipila pay iti kanayunan a kaso ti Ombudsman iti Sandiganbayan kasaruno dagiti immuna a kaso a naipila idi Nobiemnre 18 kontra kenni sigud nga Ako Bicol Partylist Representative Zaldy Co ken 15 a sabsabali pay mainaig ti substandard a flood control project idiay Oriental Mindoro.
Segun kenni Gomez, siam kadagiti akusado iti naarestar ken naiturong iti Sandiganbayan, idinto a ni Co ken dagiti innem a dadduma ket agtaltalinaed nga at large ken an-anupen ti pulisya.
Adda dagiti kaso a maipila kadagiti sumarsaruno nga aldaw ken impasiguradona a karaman ditoy dagiti “big fish” nga agpaskuan kadagiti pagbaludan kas iti inkari ti Presidente.#
