Indeklara ti Palasyo ti Malakanyáng iti special non-working holidays kadagiti sumagmamano a lokalidad ditoy pagilian para iti bulan ti Mayo.
Daitoy ket gapo iti panagpirma kadagiti serye ti proklamasyon kas panagbigbig kadagiti pista, anibersaryo, ken historical figures dagitoy a lokalidad.
Babaen ti bileg ti Proclamation No. 849, naideklara kas special non-working day iti Mayo dos sadiay Bauan, Batangas para iti Sublian Festival da, maysa a tradisyonal a selebrasyon para iti debosyon iti Banal a Krus kenpanangital-o ti nitibo a sala a ‘Subli’.
Babaen met ti Proclamation No. 850, naideklara kas special non-working day iti Mayo 5 sadiay Santiago, Isabela para iti pannakarambak ti maika-31 nga anibersaryo ti ciudad.
Iti met Proclamation No. 851, maobserbaran kas holiday idiay Kapangan, Benguet iti Mayo 5 kas panaglaglagip iti anibersaryo ti pannakaipasngay ni Governor Bado Dangwa idi 1905, maysa a prominente nga opisyal idi World War II ken nagsebi pay kas Gobernador ti Benguet manipud 1953 agingga 1963.
Babaen met ti Proclamation No. 852, naituding ti Mayo 8 kas special non-working day sadiay President Roxas, Cotabato para iti maika-58 nga anibersaryo iti pannakaibangon ti munisipalidad.
Kabayatanna, iti met Proclamation No. 853 ket mangidekdeklara nga iti Mayo 9 kas special non-working holiday sadiay San Jose, Negros Oriental para iti panagmarka ti charter day celebration iti nasao nga ili.
Mainayon pay iti dayta ket ti Proclamation No. 854 a mangidekdeklara a ti Mayo 20 ket special non-working holiday sadiay Uyugan, Batanes kas panagrambak ti foundation day da.
