BR LA UNION – Nagkedked nga agkomento iti Palasyo ti Malakanyang seknan iti gakat ni Senator Ping Lacson a mangdutok ti designated survivor iti Presidente.
Segun kenni Palace Press Officer USec. Claire Castro, iti agdama ket awan pay iti waragawag ditoy ni Presidente Ferdinand Marcos Jr.
Nupay kasta, imbaga ni Castro a mas nasay-sayaat nu mabukel nga umuna dagiti probisyon ti gakat tapno agbalin a nalawag.
Impaganetget ti Palace Official a narigat ti umannugot wenno agkedked nu saan pay a naiplastar iti pakabuklan a gakat.
Kinuna na nga adalen nga umuna ti presidente ingkaso a maipasa iti dua a pagpandayan ti kongreso.
Iti sidong ti gakat ni Lacson, mangdutok ti presidente ti maysa a miembro ti gabinete a maiturong iti sikreto ken natalged a lugar ken bantayan ti Presidential Security Command, nu agkakadwa ti maysa a pasken kas iti SONA, iti Presidente, bise presidente, senate president, house speaker ken dadduma pay nga adda iti line of succession.
