BR LA UNION – Nainget a sinupyat ti Malakanyang iti maipagarop nga spin iti sumagmamano a kongresista nga addaan panggep nga iyaw-awan ti pudno nga isyu iti anomalya dagiti flood control projects ken korapsyon, tapno ipabasol ken pagsungbaten iti Executive Branch.
Saan a nagustuan ti Executive Branch iti spin ti sumagmamano nga house members partikular iti plano nga isubli iti Department of Budget and Management (DBM) iti 2026 National Expenditure Program (NEP).
Iti maysa nga statement, nagballaag ni Executive Secretary Lucas Bersamin ken binagaanna iti House of Representatives a sungbatan ti panawagan ti publiko a full accountability kadagiti anomalya iti flood control projects kasaruno ti agtultuloy a 2026 budget deliberations.
Siniguro ni Bersamin a saan a palubosan dagiti Miyembro ti Gabinete ti anyaman a panag-atake iti integridad ken reputasyon ti Executive Branch, ken anyaman a panangikagumaan nga i-hostage iti proseso ti badyet dagiti pampulitika a teatro.
Inallokoy ti Executive Secretary iti Kamara de Representantes a maaddaan ti full accountability kadagiti miyembro iti imbestigasyon a rinugyan ni President Ferdinand R. Marcos Jr. seknan dagiti anomalya iti flood control ken dadduma pay a proyekto.
Balakad ni Bersamin iti KAMARA. CLEAN YOUR HOUSE FIRST!
Kinuna na nga awan serbi na iti imbestigasyon ti gobyerno nu saan a madalusan iti pagtataudan ti korapsyon.
Asidegen a malukatan ti Independent Commission nga ag-imbestigar kadagiti anomalyado a proyekto.
