Maitudtudo a maysa kadagiti rason ti Department of Agriculture (DA) iti nakaro a perdisyon ti sektor ti agrikultura ditoy pagilian tunggal dumuprak dagiti babagyo ket ti palpak a ken saan nga epektibo a flood control projects.
Segun kenni Agriculture spokesperson Assistant Secretary Arnel de Mesa, nu epektibo laeng dagitoy a flood control projects ket basbassit kuma dagiti perdisyon iti sektor ti agrikultura.
Impadamag ti sekretaryo a dumanon ti aganay 500K agingga 600K metriko tonelada iti tinawen a danyos ti agrikultura gapo ti panaglayos, kaadwan ket kadagiti kapagayan.
Inlawlawag ni de Mesa a nu nalaka laeng a bumaba ti layos ket napartak met kuma a makarekobre dagiti pagay agsipud ta madandanoman da met a talaga dagitoy ngem saan dan a mabaelan nu maibabad da ti nabayag a panawen iti danum ti layos.
Malaksid ti pagay ken dadduma pay nga produkto ti agrikultura ket kinuna pay ti opisyal a mabalin nga agtungpal dagiti panaglayos ti pannakatay ti adu a pasken ken perdisyon kadagiti pasilidad para ti irigasyon ken agricultural infrastructure.
Maipalagip nga idi bulan ti Hulyo ket impadamag ti DA a dumanon ti aganay P3.53-B ti napagkakadwa a perdisyon ti panagduprak dagiti Bagyong Crising, Dante, ken Emong kasta met iti Habagat.
Imbes a mapondoan dagiti palpak a flood control projects ket insingasing ti ahensya a maiturong lattang ti pondo para kadagiti irrigation facilities a pagnumaran dagiti mannalon ken outputs ti agrikultura ditoy pagilian.
Kinunana a babaen ti kanayunan a pondo kadagiti irrigation projects, makatulong pay daitoy tapno makaipasdek ti DA ken National Irrigation Administration kadagiti ad-adu pay a drainage ken water impounding projects kas kadagiti dams a mangurnong ti danom ti layos a mausar para kadagiti irigasyon.
