Pinatibker pay ti Muntinlupa City Regional trial court (RTC) ti desisyon a panag-absuwelto kenni sigud a Senador ken agdama a Mamamayang Liberal (ML) Partylist Representative Leila de Lima ken ti driver na a ni Ronnie Dayan manipud iti panagkunsabo da iti ilegal a droga.
Ti desisyon ti korte ket kalpasan nga i-remand wenno insubli ti Court of Appeals Eight Division ti desisyon ti RTC idi Mayo 12, 2023 gapo iti pannakapaay a madakamat ti partikular a mangpanpaneknek ti kinapudno kasta met a dagiti linteg a nangibasaran ti hukom ti panag-absuwelto kenni De Lima.
Impaganetget ni Muntinlupa Regional Trial Court Branch 204 Judge Abraham Joseph Alcantara a ti panangibabawi ti testimonya ni sigud a Bureau of Corrections (BuCor) chief Rafael Ragos ket umdasen a basara tapno paboran ti RTC ti constitutionally guaranteed presumption of innocence.
Kinuna idi ni Ragos nga isuna ken ti aide na a ni Jovencio Ablen Jr. ket nangipatulod ti P10-M manipud ti illegal drug trade iti uneg ti New Bilibid Prison iti balay ni idi ket sigud a Justice secretary De Lima sa Parañaque City iti las-ud ti Nobiembre ken Disyembre tawen 2012.
Aganay pito a tawen a nakabalud ni De Lima sakbay ti panagpiyansa na idi Nobiembre 2023. Ti maudi kadagiti tallo a sangsanguen na a kaso nga adda pakainaigan na ti droga ket na-dismiss idi Hunyo 2024.
