BR LA UNION – Patien ti maysa a mammanday-linteg a desperado nga addang ti plano ni sigud a Presidente Rodrigo Duterte nga agkandidato manen iti 2028 presidential elections.
Segun kenni Deputy Majority Leader ken La Union Rep. Paolo Ortega ti plano ti sigud a presidente ket panang-tagiawan iti constitutional limitations.
Inawagan ni Ortega nga olats wenno talo dagiti kandidato ti kampo ti Duterte gaputi kaadu dagiti negatibo nga isyu a sangsangwenda.
Kinuna na pay a ‘buking na buking’ iti kampo ti former president a saan dagitoy a Pro-Pinoy nudiket Pro-China.
Inpaganetget pay ni Ortega nga iti sidong ti 1987 Constitution, nainget a maiparit nga agkandidato manen ti maysa a Presidente.
Segun iti kongresista, saanen a mabalin a tumaray ti lakay a Dutere malaksid nu maamyendaran ti konstitusyon.
Binallaagan met ni Ortega ti publiko a saan a mamati kadagiti political manuevers ti bangir a kampo gaputa nalawag a panangallilaw daytoy.
Ti ar-aramiden ita ti kampo ni Duterte ket nalawag kunana a diversionary tactic tapno ilisi ti publiko manipud iti pudno nga isyu.
Nagpanawagan pay ni Ortega kadagiti umili a Pilipino nga unaen ti interes ti pagilian ken laksiden dagiti desperado a tignay iti politika.
