Intantan manen ti maysa a korte idiay Israel ti testimonya ni Israeli Prime Minister Benjamin Netanyahu para ti kaso na a graft kalpasan a kimmiddaw ti deadline tapno sangwen dagiti isyu pangseguridad mainaig ti ceasefire idiay Iran ken agtultuloy a tensyon idiay Gaza.
Segun iti korte, binaliwan da ti immuna a desisyon kalpasan a mangngeg dagiti argumento manipud kenni Netanyahu ken kadagiti lider ti militar ken chief ti Mossad spy agency.
Kasaruno daitoy ket nagpanawagan ni U.S. President Donald Trump a maibasuran ti kaso a tinawag na kas “witch hunt” ken kiniddaw a maikanselaren daitoy. Binabalaw met ni Israeli opposition leader Yair Lapid ni Trump ken kinuna a makibibiang isuna ti justice system da.
Sumangsango ni Netanyahu kadagiti tallo a kaso ti graft, pakairamanan ti panangawat na ti nagkakangina a regalo manipud kadagiti bilyonaryo kasukat ti pabor iti pulitika, ken ti gandat nga impluwensyaan ti media para kadagiti positibo a coverage.
Nangrugi idi Mayo 2020 ti panagdengngeg kenni Netanyahu ngem namin-anu a daras a natantan gapo kadagiti nagduduma a rason.
