Natuloy ita nga Hunyo 8 ti panagdengngeg kadagiti kaso a sangsangwen ti pamilya Villar idiay Department of Justice, nu sadinno ket natingiting ti palawag iti audit firm a Punongbayan & Araullo seknan ti “draft financial statements” nga inted iti Villar group kabayatan a maisaysayangkat paylaeng ti audit para ti tawen 2024.
Inlawlawag ti audit firm nga inaramid da daitoy kas maibasar iti kiddaw ti kumpanya tapno makita iti posible nga epekto na iti costing kadagiti sanikua, ngem nagparang a naiwaras ti draft nga awan iti pammalubos da.
Segun iti prosekusyon, napateg dagiti nasao a palawag ngem saan pay a mabalin a madakamat nu adda iti iregularidad agsipud ta agtultuloy paylaeng ti kaso.
Nakatuding ti sumaruno ken posible a maudi a panagdengngeg inton Hulyo 1, 2026 – aldaw a mangisubmitir met iti depensa ti kampo dagiti Villar.
Karaman kadagiti reklamo kontra kadakuada ket ti market manipulation, insider trading, ken misleading disclosures nga impila ti Securities and Exchange Commission.
