LA UNION – Kinarit ni Senador Raffy Tulfo iti sumagmamano nga opisyal ti Department of Environment and Natural Resources nga agpa-lie detector test ken polygraph test.
Iti plenary deliberations ti gakat a pondo ti DENR para iti tawen 2025, nadillaw ni Tulfo iti maysa a circular ti ahensya a mang-exempt iti sumagmamano nga impormasyon seknan iti panagminas, partikular kadagiti aplikasyon para iti Environmental Compliance Certificate (ECC), manipud iti sakop ti Freedom of Information (FOI) order.
Exempted iti Freedom of Information Act dagiti datos, impormasyon dagiti minero, mining companies seknan iti klase ti mineral a minasen ken klase ti grado.
Kinuna ni Tulfo a pinadas dagiti non-government organization a mangala ti impormasyon ngem napaay dagitoy.
Kabayatanna, inlawlawag met ni Senador Cynthia Villar, a nang-depensa iti budget ti DENR, a ti nasao nga exemption ket maiyannurot iti Data Privacy Act agsipudta iti impormasyon ket naglaun ti trade secrets dagiti mining companies.
Sungbat met ni Tulfo, nga adda karbengan dagiti umili a maamwan iti datos seknan kadagiti rekursus naturales ti estado a pagnum-numaran dagiti private entity.
Kabayatanna, nakalusot iti deliberasyon ti Senado iti gakat a P26.37 billion a pondo ti DENR para inton 2025.
