BR LA UNION – Kinuwestiyon ni Davao City Rep. Paolo “Pulong” Duterte a kasapolan ti testimonya na iti imbestigasyon ti National Bureau of Investigation (NBI) seknan iti alegasyon ti sigud a pulis a ni Rodulfo Gracioso Jr. seknan iti maipagarop a panangitulod iti minaleta a kuwarta kenkuana ken dadduma pay a kabagyan na.
Iti maysa a waragawag, imbaga ni Duterte a nu pattien dagiti na imbestigador dagiti waragawag ni Gracioso maibasar iti resulta ti polygraph wenno lie detector test, rumbeng koma nga umanayen dagiti ebidensiya nga iggem ti ahensiya a saanen a kasapolan ti statement na.
Kinuwestiyon pay ti kongresista nu saan pay a kumpleto iti ebidensiya dagiti otoridad wenno adda panagdudua ti NBI iti bukod na a panangamiris iti kredibilidad ni Gracioso.
Impaganetget na a saan nga isuna ti nangibaga a sigurado a pudno iti salaysay ni Gracioso, nudiket mismo a dagiti otoridad.
Nagpatulod ti NBI ti imbitasyon kenni Duterte idi Sabado tapno sumango iti ahensiya ita nga aldaw ti Lunes, Oktubre 12, ken maipagarop a makatulong iti pananglawlawag dagiti alegasyon ni Gracioso.
Imbaga ti sigud a pulis, a nasurok P2 bilyon ti naitulod na a kuwarta kenni Vice President Sara Duterte, P1 bilyon kenni sigud a presidente Rodrigo Duterte, ken P100 milyon kenni Paolo Duterte.
Kinuna na a naaramid ti panagdeliver nga in-inut sipud idi 2018, maibasar iti maipagarop a bilin ti sigud nga amo na a ni sigud a House Speaker Lord Allan Velasco.
Nagsumite ni Gracioso iti sinapataan a salaysay idi Setyembre 14 seknan iti maipagarop a panagitulod ti kuwarta kadagiti Duterte ken dadduma pay a personalidad.
Nagpaisidong isuna iti polygraph test iti NBI idi Setyembre 30 kas paset ti proseso ti ahensiya iti panangamiris ti kinapudno dagiti imbutaktak na.
