BR LA UNION – Natay ti 21 a tattao bayat a nasurok 100 a tattao ti naipadamag a nasugatan kalpasan ti panagdinnungpar iti dua a high-speed trains idiay southern Spain.
Segun kadagiti otoridad, posible a ngumato pay ti death toll bayat nga agtultuloy ti panagsapol dagiti rescuers iti wreckage ken survivors.
Impadamag ni Spain transport minister Oscar Puente a nasurok 30 a tattao ti agdama a maag-agasan iti ospital gaputi sinagaba da a seryoso nga injuries.
Napasamak ti insidente asideg idiay Adamuz town ken Cordoba City, idi madiskaril ti maysa a high-speed train a naggapo idiay Malaga ken agturong koma idiay Madrid, bayat a ti maysa ket naggapo idiay Madrid nga agturong koma idiay Huelva.
Aganay 300 a pasahero ti nakalugan iti tren a nadiskaril idinto a ti maysa a tren ket addaan ti 100 a pasahero.
Pad-padaanan da King Felipe Vi ken Queen Letizia dagiti development iti trahediya ken nangidanon da metten ti pannaki-simpatiya iti naulila a pamilya dagiti biktima ken nasugatan iti insidente.
Agtultuloy ti panangduktal dagiti otoridad iti makagapo ti pannaka-diskaril ti nasao nga high-speed train.
