Inwaragawag ni Philippine Coast Guard (PCG) spokesperson for the West Philippine Sea Commodore Jay Tarriela nga agtalek ni Presidente Ferdinand Marcos Jr. a ti pudno nga issue iti WPS ket nu siasino iti aglablabsing iti international law ken mangab-abuso kadagiti Pilipino a mangngalap kasta met a bully kadagit barko ti PCG.
Saan kunana daitoy a saritaan maipanggep ti “caricature” wenno transparency effort ti gobierno ti Pilipinas.
Daitoy iti nagbalin a sungbat ti opisyal iti ekslusibo a pannakiuman ti Bombo Radyo idi nadamag nu nagpatang da iti Presidente, a tumaktakder kas chief architect ti foreign policy ti pagilian, kasaruno kadagiti impila a diplomatic protest ti China.
Segun kenni Comm. Tarriela, awan met iti napagpatangan da iti Presidente maipanggep iti nasao a saritaan nupay adda iti direkta a linya ti komunikasyon ti PCG ken ti National Security Adviser iti Presidente.
Maipalagip a nangipila ti China iti diplomatic protest idi Enero kontra kenni Tarriela kasaruno iti panangusar ti opisyal ti maysa a presentasyon ti caricature ni Chinese President Xi Jinping iti panangidetalye ti mapaspasamak idiay WPS.
Impaganetget ni Commodore Jay Tarriela a saan a mabalin a manglapped iti transparency effort ti gobierno ti diplomatic protest ti China kontra kenkuana.
Pinagyamanan ni Tarriela dagiti Senador ken dadduma a kongresista a karaman iti panagtignay iti saritaan ti WPS, a maysa a dakkel a banag kenkuana, para iti PCG, ken ti umili a Pilipino nga agtaltalek iti kinapateg daitoy a laban.
Nangipadanon pay isuna ti panagsuporta iti last resort a panangideklara kas persona non grata iti Chinese Ambassador kas wagas ti diplomasiya.
