BR LA UNION – Epektibo ita nga aldaw ti Martes, Mayo 5, iti baro manen a panagngato ti presyo dagiti produkto a petrolyo.
Iti agpapada nga advisory, imbaga dagiti kumpanya ti langis a ngumato ti P2.21 ti kada litro ti gasolina ken P2.66 iti diesel.
Bayat a bumaba met ti P3.53 kada litro iti presyo ti kerosene.
Maipatungpal ti baro a presyo iti oras alas-6 ita nga agsapa.
Segun kenni Energy Secretary Sharon Garin, namnamaen a ti panagngato ti presyo ti langis ita a lawas, ket gapwanan iti panagkapsot ti piso nga umabot iti record low a P61.75 kontra dolyar idi napan a lawas.
Maibasar iti datos ti Department of Energy, adda umdas a suplay ti langis ditoy pagilian, nga agpaut ti nasurok-kumurang a 53.71 nga aldaw, kabilang iti gasolina, diesel, kerosene, jet fuel, fuel oil, ken liquefied petroleum gas (LPG).
Idi napan a lawas, apagapaman a ngimmato ti presyo ti gasolina a P0.53 kada litro, bayat a dakkel met ti bimmabaan ti diesel ken kerosene iti P12.94 ken P15.71 kada litro, segun kadagiti oil firms.
