Mangnamnama ni Senate Majority Leader Francis Tolentino a dagiti dua a baro a linteg ket mangpapigsa iti panangbigbig ti international community kadagiti karbengan ti pagilian iti teritorio, partikular iti West Philippine Sea (WPS).
Mainaig iti daytoy, ibilang ni Tolentino a balligi para iti tunggal Pilipino a pinirmaan ni Presidente Bongbong Marcos ti dua a napateg a linteg, ti Philippine Maritime Zones Act wenno Republic Act 12064 ken ti Archipelagic Sea Lanes Act wenno Republic Act 12065.
Patien ti senador a dagitoy dua a linteg ket mangpapigsa iti panangbigbig ti international community iti pannakidangadang ti Pilipinas para iti karbengan, kasta met ti opisial a pannakabigbig ti ‘West Philippine Sea’ iti global maritime ken aviation systems.
Sakbay daytoy, naragsakan met ni Tolentino ti pannakaipaulog kadagitoy a lalo pay a mangpapigsa iti territorial integrity ti Pilipinas ken ti obligasion ken karbengan ti pagilian iti amin a maritime zones agraman ti West Philippine Sea.
Kinuna ni Tolentino nga agserbi dagitoy dua a napateg a linteg kas implementasyon ti historic 2016 Hague Arbitral Ruling a nangpabor iti Pilipinas a maibasar iti United Nations Convention on the Law of the Sea (UNCLOS).
