Agtaltalek ti Malacañang a paset ti diskarte iti House prosecution ti panagdakamat ken possible a panangipasango iti kontrobersiyal a ni “Mary Grace Piattos” kas testigo iti impeachment trial ni Bise Presidente Sara Duterte, mainaig iti reklamo a biddut a pannakausar ti confidential funds.
Segun kenni Palace Press Officer Undersecretary Claire Castro, adda latta iti prosekusyon iti desisyon kadagiti testigo da.
Maibasar iti Philippine Statistics Authority (PSA), awan iti record ti Pilipinas iti umili nga agnagan ti “Mary Grace Piattos,” isu a posible a marigatan da a lasinen isuna.
Kinarit ni House prosecutor ken Manila Rep. Joel Chua ti kampo ni VP Sara nga ipasango ni “Mary Grace Piattos” iti panagusig nu kasta ket malawlawagan iti isyu.
Impaganetget na a napateg a testigo isuna gapo iti panagparang iti nagan na kadagiti acknowledgment receipts iti liquidation ti confidential funds iti Office of the Vice President.
Apaman a saan a maiparang ket kinunana nga ad-adda a pumigsa iti panagdudua a saan nga agpayso a tao daitoy ken posible a codename laeng, isu a rumbeng a mangilawlawag iti biang ti depensa.
