LA UNION – Nagdesisyon dagiti miyembro ti House Committee on Good Government and Public Accountability nga ag-kontribusyon da apno mangipaay ti gunguna iti siasinuman a makaitudo kenni “Mary Grace Piattos” a makunkuna a nakaala ti dackel a kantidad iti confidential funds ti Office of the Vice President.
Kinumpirma ni Zambales Representative Jay Khonghun a mangipaay da ti maysa a milyon a piso iti siasinuman a makaited ti impormasyon nu siasino ken sadino ti ayanna ni Piattos.
Segun kenni Khonghun a nupay adda ti dadduma pay a nagan a mapagdu-dua-an iti acknowledgement receipts, ni “Mary Grace Piattos” ti addaan kadackelan a naaala.
Rimwar iti nagan ni Piattos iti panagdengngeg ti Good Government and Public Accountability, agsipudta maipagarop a maysa isuna kadagiti signatories ti acknowledgement receipts nga insumite ti OVP iti Commission on Audit seknan iti confidential funds.
Segun met kenni La Union Representative Paolo Ortega, maikumpara ti listaan iti sari-sari store, dagiti inusar a nagan ti Office of the Vice President .
Malidayan da Khonghun ken Ortega a saan a makadar-ay ni Vice President Sara Duterte iti sumaruno a panagdengngeg ti House panel uray nu personal payen a naiyawat kenkuana iti imbitasyon.
Segun kadagiti mammanday linteg, kayatda metten a malpas ti imbestigasyon iti komite ken maaprubaran ti committee report isunga importante kadakuada ti panagdar-ay ti resource persons nga agpalawag seknan iti makunkuna a biddut a panagusar ti pondo.
