Aminado ni Presidente Ferdinand Marcos Junior a posible nga agbalin a komplikado ti sitwasyon iti panagsungbat kadagiti didigra gapo iti pangta dagiti agsasaruno a bagyo ita nga lawas.
Segun iti Presidente, nupay rumuaren ti bagyong Nika ditoy pagilian ita nga aldaw ket agsaruno met umuneg ti Bagyong Ofel ken Pepito.
Kinunana a nasken a planuen a nalaing ti maaramid nga aksyon gapo ta nu dagos a mapirmis dagiti dinadael ti immuna a bagyo ket amangan dadaelen metaleng daitoy dagiti sumaruno.
Binallaagan ti Presidente ti publiko nga agdengngeg iti lokal a gobierno ken dagiti otoridad kasta met a dagdagos a mangipaay ti tulong dagiti maseknan nu kasapulan.
Impasiguro pay ti Presidente a nailatagen amin a panagsagana mainaig iti manamnama a panagduprak ti bagyo, karaman iti nasapa a panagevacuate dagiti residente ken panag-preposition dagiti alikamen ken relief goods.
