Inwaragawag ni Senate President Vicente “Tito” Sotto III a kiddawen na kenni Presidente Ferdinand Marcos Junior nga i-certify kas ‘urgent’ iti Senate Bill 1215 wenno iti singasing-linteg para ti Independent People’s Commission (IPC) tapno mapapartak iti panakaaprobar na.
Segun kenni Sotto, panggep ti bill nga aramiden kas permanente a linteg iti agraraira nga executive order ti Presidente a nangbukel ti IPC.
Malaksid iti proyekto ti Department of Public Works and Highways (DPWH), karaman kadagiti maamiris dagiti dadduma pay nga ahensia kas iti Department of Agriculture, Department of Health, Department of Education, ken dadduma pay.
Naikalanad pay a maaddaan daytoy ti nalawa nga imbestigasyon kadagiti amin a naipadamag nga anomalya kas iti korapsion, ghost projects, overpricing, ken panagusar ti substandard a materyales, kadagiti proyekto ti national government, local government units, ken dagiti government-owned corporations.
Kabayatanna, maipaayan ti bileg iti komisyon nga itudo dagiti karaman manipud iti pampubliko wenno pangpribado a sektor ken agrekomenda dagiti kaso a kriminal, sibil, wenno administratibo kontra kadagati mapaneknekan a nagbasol.###
