Saan a bumaba ti walo a tattao ti pimmusay kalpasan a nagsuwek ti hot air balloon sadiay Praia Grande, Santa Catarina, Brazil idi Sabado ti bigat (local time), segun iti Gobernador da a ni Jorginho Mello.
Adda pakabuklan a 21 a tattao ti sakay ti air balloon ken 13 kadagitoy, pakairamanan ti piloto, iti milagro a nakalasat. Nangrugi iti uram iti uneg ti basket balloon isu ket dagos a ginandat ti piloto nga ipababa daitoy.
Idi asidegen iti daga ket binilin ti piloto a lumagto dagiti pasahero ngem saan nga am-amin ket nakalagto sakbay pay a dumakkel ti apoy.
Karaman kadagiti pimmusay ket ti dua nga agkarelasyon, ag-ina, maysa a doctor, ken maysa a figure skater bayat a naiturong met kadagiti asideg nga ospital dagiti limmagto.
Gapo iti aksidente, impatalna paylaeng iti kompanya ti operasyon da ken impaganetget nga immannurot da kadagiti amin a regulasyon ken awan met ti pakasaritaan da iti kapada a pasamak.
Kabayatanna, nangipadanon met ni Brazilian President Luiz Inácio Lula da Silva ti panakiladingit ken impasiguro a tumulong ti gobierno para kadagiti biktima.
Ti Praia Grande ket maysa a nalatak a destinasyon dagiti turista para ti hot air balloon.
