Imbatad ti Commission on Elections (Comelec) a kitaen da ti posibilidad ti panagusar kadagiti automated counting machines (ACMs) para ti umadani a Barangay at Sangguniang Kabataan Elections (BSKE) inton Disyembre uno.
Segun kenni Comelec spokesperson Atty. John Rex Laudiangco, plano da nga usaren dagiti ACMs kadagiti napili a lugar ditoy pagilian tapno mapapartak ken mapasayaat pay ti sistema ti panagbobotos.
Agtultuloy met ti panagsagana ti Comelec para ti BSKE agingga’t awan pay ti linteg a mangibagbaga ti pannakaitantan wenno pannakaiyakar daitoy. Nakalatag payen dagiti plano ti Comelec para ti nasao nga eleksyon kas iti naaramid idi May 2025 Midterm Elections.
Karaman kadagiti maaramid nga addang ket ti nasapa panagbotos, mall voting, ken ti priority polling places para kadagiti vulnerable sectors kas ti senior citizens, persons with disabilities (PWDs),ken dagiti masikog.
Mainaig iti daitoy ket ummapela manen ti Comelec iti Marcos Administration a mangnayon ti P2K honoraria kadagiti mannursuo nga agserbi iti BSKE.
