BR LA UNION – Aminado ti agdama a sekretaryo iti Department of Justice a ni Sec. Jesus Crispin ‘Boying’ Remulla a saan a dagus a malpas iti imbestigasyon seknan dagiti flood control projects anomaly.
Segun kenni Justice Sec. Remulla, atiddog a proseso ti dumalanan pay iti rinugyan a ‘case buildup’ kontra kadagiti mairam-raman iti isyu ti korapsyon.
Posible kunana nga umabot iti 120-aldaw sakbay da a makaidatag ti pormal a kaso kontra kadagiti indibidwal a madetermina a karaman iti anomalya dagiti infrastructure projects.
Impaganetget na a swerten nu maiserbi wenno makaala da ti ‘warrant of arrest’ kontra kadagiti respondents agingga paskua nu mapapartak ti proseso.
Inlawlawag ti sekretaryo nga agtultuloy pay laeng iti ‘case-buildup’ ken dumalan pay iti preliminary investigation sakbay a maidatag ti maiyannatop a kaso iti korte.
