LA UNION – Dismayado dagiti mammanday linteg iti saan manen a panagparang ni Vice President Sara Duterte iti budget deliberation iti plenaryo ti Kamara a nabirngasan a maikadwa a kangatuan nga opisyal ti pagilian.
Immuna a nag-privilege speech ni Rep. Gabriel Bordado seknan iti saan a panagbalin a transparent iti panaggastos ti pondo ti Office of the Vice President.
Kinuna met ni Gabriela Partylist Rep. Arlene Brosas, saan a maiparbeng ti saan a panagparang ni VP Sara iti budget deliberations, maibilang daytoy kunana a panangbastos, nangruna ket matal-talantan iti pondo ti opisina na, nga aggapo iti pondo ti ili.
Impaganetget ni Brosas, a saan man laeng a nagpatulod ti authorized representatives a dumar-ay iti pannakatalantan ti pondo.
Kinuna ni Brosas a maysa a duty a sungbatan ti salodsod iti budget deliberations gaputa kuwarta dagiti umili ti pagsasaritaan, saan daytoy a choice a mabalin nga itantan wenno italek lattan ken saan met a mabalin nga usaren iti tradisyon tapno libasan ti agsungbat nu kasatnu a ginastos iti pondo.
Nangipaay met ti bukod a waragawag da Rep. Raoul Manuel ken Rep. France Castro.
Kabayatanna, saanen nga inuray ti Kamara a sumangpet ti bise presidente isunga rinugyan dan a talantanen iti 2025 OVP budget.
Maibasar iti committee report ti Appropriations panel, nakissayan ti pondo ti OVP ti aganay P1.3 Billion ken umab-abot laengen ti nasurok P733 million ti naisingasing para iti fiscal year 2025.
