LA UNION – Nakarkaru iti inaramid a panang-gastos ni Vice President Sara Duterte iti P125 milyon a confidential fund na iti uneg laeng ti 11 nga aldaw idi 2022 nu ikumpara iti PDAF scam ti convicted a ni Janet Napoles.
Daytoy iti imbatad ni House appropriations committee chairman Zaldy Co kagiddan ti panangibaga na a ti inruar a video ni Duterte ket maysa manen a diversionary tactic.
Iti panagdengngeg idi Martes para iti kidkiddawen a P2.037 bilyon budget ni Duterte para iti 2025, impaganetget ni Rep. Co iti kinapateg a maamwan nu kasatnu a nagastos iti pondo ti ili.
Maibasar iti report, imbaga ni Rep. Co a nangiruar ti notice of disallowance iti Commission on Audit kontra P73 milyon a confidential fund a ginastos ni Duterte idi 2022.
Iti P73 milyon ket paset ti P125 milyon a confidential fund a naibos ni Duterte iti uneg laeng ti 11 nga aldaw.
Segun kenni Co, inatiw na pay iti Napoles fund a 60 days a ginastos ti kuwarta.
Iti dak-dakamaten ni Rep. Co ket ni Janet Napoles, iti negosyante nga utek iti P10 bilyon Priority Development Assistance Fund (PDAF) Scam. S
Ni Napoles ket agdama a nakabalud gaputi nasao nga scam.
Dinillaw pay ni Rep. Co iti nakaa-adu a bodyguard ni Duterte, maibilang a kaadwan iti pakasaritaan ti Pilipinas.
Saan pay a pinakawan ni Rep. Co iti kunana a kaawan ti respeto ni Duterte iti Kongreso a binilin ti Konstitusyon tapno siripen iti panaggastos iti pondo ti pagilian.
Dinillaw pay ni Rep. Doris Maniquiz (2nd District, Zambales) iti panaggastos ti opisina ni Duterte iti P53 milyon para kadagiti satellite office na, a kapad-pada met laeng iti trabaho dagiti regional offices ti Department of Social Welfare and Development, Health, Labor and Employment, ken Technical Education and Skills Development Authority.
