LA UNION – Mapagsasaritaan ita kadagiti naduma-duma nga ili ti probinsya a La Union iti maipagarup a panangiwas dagiti kandidato kadagiti bagas ken groceries.
Base kadagiti impormasyon a dumandanon iti Bombo Radyo La Union, adda dagiti barangay iti syudad ti San Fernando ken ili ti Luna a maipagarup a nasaknap iti pangiwaras kadagiti nasao a banag nga agtataud manipud kadagiti kandidato.
Maipagarup nga adda pay dagiti kandidato idiay ili ti Bauang ti agiwarwaras kadagiti jetmatic ken uray pay iti tarong kadagiti botante.
Idiay ili ti Naguilian, maipagarup nga adu a kandidato ti agpapainum, agpapameryenda ken agiwarwaras ti kwarta.
Gapu ti nasao a mapaspasamak, naduma-duma met ti agbalbalin a reaksyon dagiti umili wenno netizens maipapan iti nasao nga aramid dagiti kandidato.
Iyarig pay dagiti umili, nga adda ti ramrambakan a piyesta wenno panawenen ti Paskua.
Sumagmamano met ti agsidsiddaaw gapu ta awan met ti kalamidad ket adda ti agruar a relief goods a mait-ited kadagiti botante.
