LA UNION – Iti umuna a gundaway ket nagsarita ni Atty Harry Roque kasaruno ti pannakaiwaras dagiti wanted poster na iti kalsada.
Maipalagip nga idi Biyernes, Sept 20, nagipegket dagiti miyembro ti Akbayan iti wanted poster ket naimuntar iti nagduduma a lokasyon, a naka-imprentaan ti sumagmamano a sarita kas ti POGO lawyer.
Inawagan ni Roque kas “cheap political stunt’ ti nasao nga addang ken binalakadanna ti Akbayan nga ag-pokus laengen tapno ilaban dagiti ordinaryon a Pinoy imbes nga aramiden daytoy.
Innayon pay ti sigud a mammanday linteg, a makapaliday nga agbal-balin a bulsek, umel, ken tuleng iti grupo nga Akbayan nu maipapan kadagiti kangrunaan nga isyu a mangap-apektar iti adu a Pilipino kas ti panangiyakar ti pondo ti Philhealth.
Mas ipapaayan da pay kunana ti atensiyon iti kas kenkuana a maysa a private citizen.
Impaganetget pay ti abogado, a saan isuna a maysa a pugante ken awan ti linabsing na nga anyaman a linteg.
Immunan a nangirwar ti arrest order iti Kamara kontra kenni Roque ngem idi iserbi ti House Sergeant-at-Arms iti address na idiay Makati City, ket awan sadiay ti abogado.
Immunan nga imbaga ti Philippine National Police (PNP) a nangbukel daytoy ti tracker team tapno sapolen ti sigud a presidential spokesperson.
