Impasigurado ti Philippine National Police (PNP) nga agbalin a transparent ken masurot ti umiso a proseso iti panangpaawid ditoy pagilian kenni Ako Bicol Party-list Representative Zaldy Co manipud idiay Czechia.
Segun kenni PNP Spokesperson Police Brigadier General Randulf Tuaño, agraira ti transparency manipud iti panagsangpet ni Co – karaman ditan ti booking procedures a kas ti mugshot ken medical examination – agingga iti panagsango na ti Sandiganbayan.
Kinuna ni Tuaño a mangrugi iti proseso sadiay Department of Foreign Affairs (DFA) para ti turnover sadiay Department of the Interior and Local Government (DILG), sakbay a maiturong iti Criminal Investigation and Detection Group (CIDG) idiay Camp Crame para ti fingerprinting, mugshot, medical, ken physical examination. Kalpasanna ket maiturong ton ni Co sadiay Sandiganbayan para ti return of warrant of arrest.
Binilin metten ni PNP Chief Police General Jose Melencio Nartatez Jr. ti pulisya a saganaan dagiti nagduduma a mabalin a mapasamak iti panagsangpet ni Co iti airport.
Agtultuloy iti koordinasyon ti gobierno ti Pilipinas kadagiti foreign counterparts da idiay Czechia para ti panartak a panangpaawid iti sigud a mamanday-linteg a nainaig iti nagan na ti nalawa nga eskandalo dagiti flood control projects.
