LA UNION – Inawagan ti Malakanyang a maysa a garapal a panawagan nga ag-kudeta iti Armed Forces of the Philippines (AFP) kontra Marcos administration ken tallikudan iti sinapataan da a pagrebbengan, tapno laeng agtugaw iti kangatuan a pwesto iti anak na a ni VP Sara Duterte.
Daytoy iti insungbat ni Executive Secretary Lucas Bersamin iti inebbatan a sarita ni sigud a Presidente Duterte nga arigna mangal-allokoy kadagiti suldado a kontraen iti agdama a nakatugaw a presidente a ni Ferdinand Marcos Jr.
Segun kenni Bersamin, awan ti sabali nga iyawag iti nasao a panawagan ti sigud a presidente nu saan a managimbubukod a motibo nga addaan gandat a patakyasen iti pwesto wenno i-kudeta ti agdama a presidente ti pagilian tapno laeng maipatugaw iti anak na.
Impaganetget ni Bersamin, a rumbeng a respetuen ni Duterte iti konstitusyon a saan ketdi a kontraen.
Imbaga pay ni Bersamin a nasken nga isardengen ni Duterte iti panagbalin nga iresponsable.
Kinuna na a saan a nasayaat nga insultuen dagiti suldado a propesyunal a mangak-akem ti misyon ken pagrebbengan da ken allokoyen dagiti a tallikudan iti konstitusyon tapno laeng agballaygi ti bukod nga interes.
Siniguro met ni Bersamin a saan nga agpaltos ti administrasyon iti mandato na nga idaulwan a nasayaat ti pagilian, maiyannurot iti konstitusyon ken iti rule of law.
Siniguro na pay nga agtignay iti estado kontyra kasdagiti saan a naingkalintegan ken gandat a panaglabsing iti linteg.
Impaganetget ni Bersamin a saan a maiparbeng iti nadursok a panangagaw ti bileg tapno ipatugaw kas president, babaen ti panangpatay, panagriribok ken panag-rebelde.
Binagaan ni Bersamin dagiti Duterte nga aguray da ti umno a panawen ken suroten ti umno a wagas.
