BR LA UNION – Ikonkonsidera ita dagiti otoridad iti possible a koneksyon ti maipagarop a pangta idiay Senado iti 18 nga indibidwal a nagpabigbig a sigud a bodyguards ni dati nga Ako Bicol Party-list Representatives Zaldy Co, nga immuna a naikonektar iti alegasyon ti kickback iti anomalya ti flood control projects.
Segun kenni Senate President Pro Tempore Sherwin Gatchalian, a seryoso ti Senado iti anyaman a pangta iti seguridad, ken dagus a binilin na iti Office of the Senate Sergeant-at-Arms a maki-koordinar iti naduma-duma nga intelligence agencies tapno iberipika iti impormasyon.
Iti agdama, naipasidong iti heightened security status ti Senado nangrugi idi Hunyo 9.
Naipatungpal pay ti dua nga aldaw a remote work setup kas panagannad.
Naamwan a naggapo ti impormasyon iti National Bureau of Investigation, kalpasan a rimwar iti posibilidad a maysa nga armado a grupo iti posible nga agparnuay ti riribok idiay Senado.
Kabayatanna, imbaga ni Senate Sergeant-at-Arms Alfred Sotto Corpuz a naki-koordinar dan kadagiti law enforcement agencies tapno saan nga agballaygi ti anyaman a pangta ken agtalinaed a natalged iti uneg ti Senado.
