Namnamaen ti Philippine National Police (PNP) a bumassit ti bilang dagiti aksidente ti kalsada ken pannakalmes iti baybay ita a 2026 Holy Week no idilig iti napalabas a tawen.
Segun iti PNP, posible a basbassit ti agbiahe gapu iti nangato a presio ti lana nga inggubuay ti agtultuloy a gubat idiay Middle East.
Kinuna ni PNP Spokesperson Police Brigadier General Randulf Tuaño nga idi napan a tawen ket 919 ti natay gapu iti reckless imprudence, nangatngato no idilig iti nasurok a 800 idi tawen 2024.
Maibasar iti datos manipud iti PNP Maritime Group, 151 nga insidente ti pannakalmes ti nairekord idi napan a tawen, nga immadu ngem iti 90 a kaso idi 2024.
Innayon ti PNP a nakadkadlaw ti nababbaba a bilang dagiti biahe a rumrumuar iti Maynila gapu ta saan a nagpasada dagiti dadduma a kompania gapu iti nangato a presio ti lana.
Laksid daytoy ket impanamnama ti PNP nga agtultuloy ti panangmonitorda kadagiti insidente ti pannakalmes ken aksidente iti kalsada, ken agtalinaed da a naka-heightened alert babaen ti panangideply ti umdas a personnel kadagiti nagduduma a lugar.
