Pinapigsa ti Department of Energy (DOE) ken ti U.S. Grains Council iti relasionda tapno mapatibker ti panagusar ti biofuel ditoy Pilipinas.
Iti panagtaripnong da DOE Undersecretary Alessandro O. Sales ken dagiti pannakabagi ti konseho, napagnunumuan iti naun-uneg a kooperasyon para iti panagpadur-as ti biofuels sectors iti pagilian.
Karaman kadagiti natalantan iti agtultuloy a suporta ti U.S. Grains Council babaen ti technical assistance, capacity-building programs, ken policy support, kasta met ti feedstock development ken panagsagana para iti nangatngato nga ethanol blending targets.
Impasigurado ti DOE iti agtultuloy a panagreggetna a mangpapigsa iti seguridad ti enerhia ti pagilian babaen kadagiti biofuels ken pannakitinnulong kadagiti international partners.
Iti agdama, maipatpatungpal ti biofuel blending iti pagilian, a pakausaran ti coconut oil para iti biodiesel ken sugarcane para iti bioethanol.###
