LA UNION – Umabot iti P11,000 cash ti intaray iti saan pay a nabigbig a suspek manipud iti maysa a pasahero kabayatan nga adda dagitoy iti uneg ti jeepney ditoy syudad ti San Fernando, La Union.
Iti pannakiuman ti Bombo Radyo iti biktima a ni Gloria Abenes a taga-Barangay Al-alinao Norte, Naguilian, kinunana a naggapu isuna idiay ilida a naglugan iti jeepney nga agturong iti syudad tapno gumatang iti lamisaan ken dadduma pay nga alikamen.
Saan a namnamaen ti biktima a mapukawan daytoy iti wallet a naglaon ti nasao a kantidad, passport ken ID’s kabayatan nga adda iti uneg ti lugan gapu ta nakapagplete pay daytoy.
Atapen ni Abenes a ti katugawna a lalaki nga immuna a bimmaba manipud iti jeepney ti nangkaot ken nangitaray kadagiti nadakamat a banag.
Umap-apela met ti biktima nga uray iti laengen passport ken IDs ti maisubli kenkuana.
