LA UNION – Dagus a naipasidong iti booking process ni Kingdom of Jesus Christ Pastor Apollo Quiboloy, ken dagiti uppat a kakadwa na nga akusado nga isuda Jackielyn Roy, Ingrid Canada, Cresente Canada ken Sylvia Cemañes.
Naalaan dagitoy fingerprints ken mug shots idi naiturong ken simmangpet da idiay Camp Crame, Quezon City.
Naiserbi ti warrants of arrest kadagiti akusado gaputi kaso a Child Abuse, Sexual Abuse, ken Qualified Trafficking.
Segun kenni PNP Spokesperson Col. Jean Fajardo, naalaan pay ti blood pressure da Quiboloy ken sumagmamano kadakuada ti nangato iti presyonna.
Naiturong da Quiboloy idiay Kampo Crame, babaen ti C-130 military plane manipud Davao City.
Simmuko dagitoy babaen ti nakapya a negosasyon kalpasan a naipaayan da ti 24 nga oras nga ultimatum ken joint effort ti Philippine National Police ken Intelligence Service ti Armed Forces of the Philippines.
Kinumpirma pay ni Fajardo, nga iti uneg ti Kingdom of Jesus Christ Compound a simmuko dagiti lima.
Nakabalud itan iti PNP Custodial Facility idiay Kampo Crame ni Apollo Quiboloy.
