Imbilin ni Presidente Ferdinand Marcos Jr. iti legal team na nga adalen ti pannakaidutok ni Baguio City Mayor Benjamin Magalong a kas special adviser ti Independent Commission for Infrastructure (ICI) a nabukel tapno imbestigaran dagiti maanomalya nga infrastructure projects kadagiti napalabas a sangapulo a tawen.
Segun kenni Palace Press Officer Undersecretary Atty. Claire Castro, ad-adalen itan ti legal team ti nasao a topiko tapno maliklikan ti aniaman a panaglabsing ti linteg. Kitkitaen pay dagiti abogado nu nasaysayaat nga agtalinaed wenno maisali pay ti Mayor tapno agtalinaed ti independent commision.
Maipalagip nga indutok mismo ni Presidente Marcos ni Magalong kas special adviser ti ICI kasaruno nga impresentar ti Mayor iti bagbagi na a segun kadaitoy ket addaan isuna kadagiti impormasyon ken datos para ti imbestigasyon kadagiti maanomalya a flood control projects iti masakopan na.
Ita laeng a lawas ket nakagun-od kadagiti pammabalaw iti kontrobersyal a konstruksiyon ti P110-M a tennis court ken parking building idiay Baguio City kagiddan iti pannakaibutaktak ti records a nai-award daitoy iti Saint Gerard Construction General Contractor and Development Corporation, maysa kadagiti kompaniya ti agassawa a Curlee ken Sarah Discaya a sentro ita dagiti palpak a flood control projects.
Mainaig iti daitoy ket inlawlawag met ni Mayor Magalong a dimmalan ti legal a proseso dagiti amin a nagbalin nga aksyon ti Bids and Awards Committee ken implementing offices seknan ti pannakaipasdek ti proyekto.
