BR LA UNION – Imbilin ni Presidente Ferdinand Marcos Jr. ti pannakabukel ti crisis management committee a mangipamaysa kadagiti kasapulan dagiti umili.
Daytoy ti kinumpirma ni Palace Press Officer USec. Claire Castro kalpasan ti agtultuloy a krisis idiay Middle East nga adda epektona ditoy Pilipinas.
Inbutaktak ni Castro nga addan iggem na a draft seknan iti pannakabukel ti Crisis Committee iti tengnga ti agtultuloy a pasamak idiay Middle East.
Segun kenni Castro, sakbay nga adda nangisingasing, imbilinen ti Presidente ti pannakabukel ti nasao a komite.
Kinunana a maisap-sapinal laengen daytoy ken ingkari ni Castro nga iruarna dagiti detalye apaman a malpas ti linaon ti draft.
Innayon ni Castro nga iti sumaganad nga aldaw ket posible nga iyanunsiyo daytoy ti Palasyo ken siasino ti posible a mangidaulo ti komite.
