BR LA UNION – Impadamag ni Presidente Ferdinand R. Marcos Jr. iti pannakaingato ti maternity benifits, a sungbatan ti Philippine Health Insurance Corporation wenno PhilHealth, para kadagiti inna nga agpasngay iti normal ken cesarean section.
Segun iti Presidente, ammo na nu kasatno kangina ti agsikog ken agpasngay ditoy Pilipinas gapu kadagiti check-up, laboratory test, panagturong iti ospital ken panaggatang ti agas.
Kinuna ti Presidente, adu dagiti inna ti saan nga agtur-turong iti doktor agsipudta saan da a kabaelan ti agbayad ti nangina, banag a kayat ti Presidente a mabaliwan.
Mangrugi ita nga aldaw ti Huwebes, Abril 30, 2026, ipatungpal ti PhilHealth iti mas nalawlawa ken panagngato ti maternity benefits.
Iti sidong ti baro a benepisyo, naipangato iti P29,000 ti coverage para iti normal delivery manipud iti sigud a nasurok-kumurang P9,750.
Para met iti cesarean section, dumanonen ti P58,000 agingga P62,000 iti sakop ti benepisyo manipud iti sigud a P37,000.
Tarigagay ti Presidente a mapatalinaed ken naurnos iti serbisyo para iti salun-at dagiti ina ken maladaga.
Impaganetget na iti kinapateg ti nasao nga addang tapnu masigurado nga amin nga ina ket natalged nga aganak nga awan ti pampanunuten a gastos.
