Indeklara ni Presidente Ferdinand Marcos Jr. ti bulan ti Mayo kas Ease of Doing Business (EODB) Month.
Panggep daitoy a papigsaen ti pangipaay ti napapateg a serbisyo ti gobierno, aramiden a nakaaya-ayat ti aglawlaw para kadagiti negosyo, ken pasayaaten ti panagraira ti bureaukrasya.
Babaen ti Proclamation No. 818, binilin ni PBBM ti Anti-Red Tape Authority (ARTA) nga idauloan ti tinawen a panagrambak ti Ease of Doing Business Month ken ital-o dagiti programa nga adda pakainaigan na iti daitoy.
Nakalanad pay iti proklamasyon ng amin nga ahensya ti gobierno a sakopen ti RA No. 9485 wenno Anti-Red Tape Act of 2007, agraman dagiti Government-Owned or Controlled Corporations (GOCCs) ken local government units (LGUs), ket nasken a makikoordinar ti ARTA para iti epektibo a pannakaipatungpal dagiti aktibidad mainaig iti EODB Month.
Maparegta met dagiti non-government organizations (NGOs) ken pribado nga sektor a makipamaysa ken suportaran ti ARTA iti implementasyon dagiti inisyatibo para iti pannakapalaka ti proseso ti panagnegosyo.
