BR LA UNION – Inyanunsiyo ni Presidente Ferdinand Marcos Jr. idi kalman, Sabado, Abril 18 ti mas dakdakkel a rollback wenno kissay iti presyo dagiti produkto petrolyo iti sumaruno a lawas.
Segun iti Presidente, bumaba ti P24.94 kada litro iti diesel, gasolina – P3.41, ken kerosene – P2.00.
Mas dakdakkel ti rollback iti sumaruno a lawas kumpara iti napalabas ken manamnama a mangipaay daytoy ti gin-awa iti publiko.
Impaganetget pay ti Presidente a rumbeng a marikna ti tunggal Pilipino ti tunggal sentimo a bumabaan ken maliklikan ti pannaka-istorbo iti panagpila.
Mainaig ti daytoy, nagpanawagan ti Presidente kadagiti oil companies nga ipatungpal ti sibubukel a rollback ken awan ti aramiden a panangitantan iti rollback iti presyo ti langis, kagiddan ti manamnama a dakkel a kissay iti sumaruno a lawas.
Kasta metten, inallokoy ti ehekutibo iti publiko nga ipulong iti opisina na ken iti Department of Energy dagiti aglabsing iti agraraira nga oil price tapno masungabatan a dagus dagitoy.
Immunan nga imbaga ti Department of Energy a posible ti baro a rollback.
Manamnama a maiyanunsiyo iti opisyal a price adjustments inton Lunes ken maipatungpal inton Martes.
Kabayatanna, inwaragawag pay ti Presidente a pinawaywayan pay ti tallo a bulan iti Land Transportation Office iti bileg dagiti lisensya ken rehistro nga agpaso ita a bulan ti Abril, nga awan ti multa, gaputi krisis idiay Middle East.
