Imbilin ni Presidente Ferdinand Bongbong Marcos Jr. nga ire-examine ti disenyo dagiti flood control projects ti Metro Manila kalpasan a napadasan iti napartak a panagngato ti lebel ti danum iti kangitngitan ti Super Typhoon Carina ken habagat.
Ti panag-inspeksyon ni Presidente Marcos idiay Malabon, Navotas ken Valenzuela, nadlaw na a saan a kas kaadu ti danum ti tudo idi Bagyong Ondoy iti Bagyong Carina ngem nakarkaro ti epekto daitoy ken ad-adu a lugar iti nalayos nu idasig iti panaglayos idi panawen ti Ondoy.
Napaliiw pay ti presidente nga ad-adu itan dagiti flood control projects no idilig iti panawen ni Ondoy.
Malaksid iti daytoy, kinunana, adun dagiti pumping station kadagiti siudad, dagidiay laeng ti agproblema gapu ta agibelleng dagiti tattao iti basura a pakaigapuan ti pannakastuck ken saan ton nga epektibo ti pasilidad.
Saan met nga ilaksid ni Presidente Marcos ti posibilidad a ti layus ket gapu iti nadadael a navigation gate sadiay Navotas kalpasan a dinnungpar ti maysa a barko.
