BR LA UNION – Nagdeklara ti holiday ni President Ferdinand Marcos Jr. iti sumagmamano a lugar ditoy pagilian ita a bulan ti Enero.
Maibasar iti Proclamation No. 768, indeklara na iti Enero 20 kas Special (Non-working) Day idiay siyudad ti Lipa, Batangas para iti selebrasyon ti Coffee Festival.
Segun iti Malakanyang, babaen daytoy a wagas ket maipaayan ti sibubukel nga oportunidad dagiti residente a makipaset ken ma-enjoy ti nasao nga okasyon.
Maibasar met iti Proclamation No. 769, deklarado kas Special (Non-working) Day iti Enero 23 idiay probinsya ti Bulacan para iti anibersaryo ti pannakabuangay wenno inagurasyon ti First Philippine Republic a naisayangkat idiay Barasoain Church idiay Malolos.
Kabayatanna, iti Proclamation No. 770, naideklara kas Special (Non-working) Day iti Enero 31 idiay Lian, Batangas tapno ipaayan dalan iti selebrasyon ti Liberation Day iti nasao nga ili.
