Agtaltalek ni Presidente Ferdinand Marcos Jr. a pumigsa manen ti ekonomiya ti Pilipinas babaen iti agresibo a panagpuonan, panangallukoy kadagiti baro nga investors, ken panangiwayat kadagiti barto nga insentibo iti panagnegosyo.
Segun iti Presidente, karaman iti banbantayan ti gobierno ket ti “stagflation” wenno naggidan a panagbuntog ti ekonomiya ken panagngato ti presyo dagiti magagatang.
Tapno malabanan daitoy, ket papartaken iti pagilian iti panaggastar kadagiti pampubliko a proyekto ken panangiyuswat kadagiti addang a mangpababa ti implasyon.
Karaman kadagiti maibunong a tulong ket ti subsidiya ken fuel discounts para kadagiti adda iti sektor ti transportasyon.
Ipamaysa pay ti gobierno ti panagbiruk iti wagas a masuportaran dagiti Micro, Small and Medium Enterprises (MSMEs) nu kasta ket mapagtalinaed a natibker latta ti ekonomiya kontra ti sangalubongan a krisis ti langis ken dadduma pay a karit.
