Tarigagay ni Presidente Ferdinand “Bongbong” Marcos Junior ita a 2025 ti panagballigi dagiti Pilipino iti panagbalin a nadisiplina, panangipateg iti kultura ken panagayat iti pagilian.
Iti linawas a vlog-na, dinakamat ti Presidente ti ugali dagiti Pilipino nga addaan iti New Year’s Resolution isu a mensahe daytoy kadagiti umili ti kaadda ti disiplina iti amin nga aspeto manipud iti bagi agingga iti ruar ti pagtaengan ken kadagiti dadduma.
Kinunana pay a rumbeng nga adda disiplina ti tunggal maysa para iti salun-at, taraon, panangiggem iti kuarta, panagurnong, disiplina no agusar kadagiti gadget, disiplina iti ugali ken panagsasao.
Innayon ni Presidente Marcos a rumbeng met nga adda disiplina dagiti Pilipino kadagiti kalsada ken iti panagmaneho, iti panagibelleng iti basura, ken saan nga agbalin a nasukir iti kalsada.
Kinuna ti Presidente a ti New Year’s Resolution na ket ad-adda a agdisiplina, nasaysayaat ti panangaywanna iti salun-at ken maliklikan ti panagsakit gapu iti kaadu ti trabaho.
Karaman iti tarigagay ti Presidente kadagiti Pilipino ti maaddaan iti panangipateg iti kultura ken panangipakita iti talento ken kabaelan iti lubong a kas kenni Sofronio Vasquez a nagbalin a grand champion iti “The Voice” USA ken kaunaan a Filipino ken kaunaan nga Asiano a nangabak iti kampeonato iti nadakamat a kompetisyon.
Maikatlo a tarigagay ni Presidente Marcos ti panangiraman dagiti Pilipino iti New Year’s Resolution da ti panagayat iti pagilian babaen ti panangtulong kadagiti lokal a komunidad ken saysayaaten da iti panagtrabaho.
