Nagyaman ni Presidente Ferdinand Marcos Junior kenni Oman Sultan Haitham Bin Tarik ken ti gobiernona iti naballigi a panangibabaetda tapno mawayawayaan dagiti 17 a Filipino seafarers crew ti M/V Galaxy Leader sadiay Red Sea manipud iti ima dagiti rebelde a Houthi idi Nobiembre 2023.
Dinayaw ni Presidente Marcos dagiti mainaig nga ahensia ti gobierno ti Pilipinas ken dagiti private instrumentalities a saan nga nabannog a nakipagtrabaho kadagiti foreign governments ken entities tapno mawayawayaan dagiti Pilipino kalpasan ti uppat a gasut duapulo ket siam nga aldaw.
Immunan a pinasingkedan ni Presidente Marcos a nawayawayaanen dagiti 17 a Pinoy seafarers.
Innayon pay ni Marcos a dagiti natured a Filipino seafarers ti rason no apay a pinirmaanna ti magna carta of Filipino seafarers tapno masalakniban ti karbengan ken pagimbaganda, maitandudo ti full employment, ken masigurado ti agpapada a gundaway iti maritime industry pakairamanan ti pannakagun-od iti edukasion ken panagsanay ken panagdur-as a nakabase maipapan kadagiti agdama a domestic, international laws, standards, ken conventions.
Dagiti Filipino seafarers ket adda itan iti kustodiya ti Philippine Embassy sadiay Muscat, Oman.
Agdama metten a maporproseso ti panagsubli da ditoy Pilipinas.
