Saan pay a maibaga ni Presidente Ferdinand Marcos Jr. no agbaliw ti panagkita na iti kontrobersial a Senate Bill 1979 wenno ti Adolescent Pregnancy Prevention Bill, a singasing a mangtaming iti dumakdakkel a panagsikog dagiti teenager iti pagilian.
Daytoy ket kalpasan nga inpila ni Senador Risa Hontiveros ti substitute bill iti nasao a singasing kalpasan ti pannakaikkat ti sumagmamano a pirma dagiti Senador iti committee report.
Segun kenni Presidente Marcos, masapul nga umuna a basaenna ti nadakamat a substitute bill ken ditoy na nga ibasar ti opinionna iti nasao a banag.
Sibibileg a kinontra ti Presidente ti sumagmamano a linaon ti singasing kalpasan a binasana daytoy idi ngudo ti lawas.
Nangruna a nasdaaw ti Presidente kadagiti probision iti gakat a mangitantandudo iti panangisuro kadagiti banag uray kadagiti ubbing nga agtawen iti uppat.
Ngem iti substitute bill nga inpila ni Hontiveros, naikkat ti termino a “guided by international standards” ken nalawlawagan met iti singasing a dagiti adolescents ket agtutubo nga agtawen iti sangapulo agingga iti 19.
Maisuro laeng ti Comprehensive Sexuality Education (CSE) iti nadakamat nga edad a mangtaming iti parikut ti panagsikog dagiti teenagers kas isyu ti salun-at dagiti agtutubo nga ina ken dagiti maladagada.
